政情：蔡堅轟《蘋果》失實亂港
候任特首梁振英（CY）當選後第四日，《蘋果日報》就將傳聞當真嘅一樣大書特書，醫學會會長蔡堅無辜被牽涉其中，尋日蔡堅率先反擊，發出嚴正聲明批評《蘋果》尋日題為「梁振英十大門徒現形記」嘅頭版報道失實，對此表示憤慨，又語帶感慨話香港若然任由傳媒捕風捉影，亂做文章，呢個先係令香港淪為次等城市嘅主要原因。
蔡堅尋日傍晚發表聲明，逐點反駁《蘋果》嘅失實內容。佢首先話，自己根本從無參加過報道中提及北京清華大學舉辦嘅中國政治經濟研究課程，而且由○四年至今，在任醫學會會長同前會長都從無參加過國內任何課題，又指自己雖為香港專業聯盟嘅當然理事，但在任以來只出席過唔多於六次會議。
澄清與CY無私交
蔡堅續反駁《蘋果》指，近年同CY只有與業界事務有關嘅聯繫，又從冇獲邀出席CY嘅私人活動，或到其寓所飯局，所以同CY根本冇任何私交，佢反而去過參選特首落敗嘅唐英年官邸，當時係同其他專業團體代表一齊去嘅。