政情：工聯強行啟動風車陣
特首選舉告一段落，不過各大黨派都冇喘息機會喎，因為大家已經密鑼緊鼓籌備緊九月立法會選舉。好似決意今屆大展拳腳嘅工聯會咁，年幾前已經諗好個「風車陣」，即係由「票后」陳婉嫻出戰區議會超級議席，其餘五個直選選區亦派人出戰。呢個陣法對有一定地區支持度嘅工聯會當然係好理想啦，不過我哋收到消息，話呢個算盤最終未必可以打得響，因為西環隻無形之手原來已經悄悄伸出，阻止工聯會派人出選九龍西。
九龍西九月選舉議席並無增加，一般估計五位現任立法會議員如果競逐連任的話，亦可以順利連任。不過大家唔好唔記得，現任九西立法會議員梁美芬（鼠王芬），當日係得到工聯會之助先可以入圍，西環亦好明白呢一點，所以一直唔鼓勵工聯會自己派人出選，以免整死鼠王芬之餘，自己亦拎唔夠票爭位，益晒泛民。
據講，西環近日已經開始勸退工聯會，希望佢哋顧全大局，繼續幫鼠王芬助選。只不過工聯會內就唔係咁諗，內部認為今次選舉關乎工聯會將來可唔可以進一步壯大，所以內部班兄弟姊妹實在唔想再讓畀鼠王芬，佢哋仲搬建造業總工會理事長周聯僑（僑哥）出去九西參選添。
嫻姐帶周聯僑落九西造勢
僑哥全港知名度麻麻，不過喺工會裏面地位就好高，唔少九西勞工同基層票都肯定畀面佢，要爭一席並唔係冇機會。為咗催谷僑哥知名度，嫻姐呢排都不時陪同僑哥落區，好似尋日佢兩個就帶隊去深水埗睇劏房，僑哥出身建造業，不斷向在場傳媒解釋劏房問題有幾嚴重，仲話一幢舊大廈承重量若超標百分之二十，隨時會出現塌樓危機咁話。僑哥要求政府盡快興建公屋，同時立例規管劏房質素，咁先保障到市民安全。
嫻姐為咗「造王」，尋日都甘心做配角，不過佢亦有講番幾句，話自己絕對唔會加入候任特首梁振英內閣做官，因為自己性格火爆，都係做監督政府角色較好咁話；佢仲話，下屆行政會議如果會長鄭耀棠堅持唔玩的話，工聯會亦相信有合適人選坐入去，不過就點都唔係佢喎。工聯會堅持高調落區宣傳，唔通真係想同西環拗頸，希望可以爭到機會出選九龍西？