江山易改，淫性難移，淫賤黎旗下壹淫媒長期禍港殃民，終於有一個比較大快人心嘅裁決。私隱專員公署發表兩份報告，指摘壹淫媒兩份雜誌《忽然1周》同《FACE》，以有計劃嘅監察方法，利用長鏡頭以及放大器偷拍三名藝人家中私人活動，嚴重侵犯個人私隱，違反《個人資料（私隱）條例》。
簡單咁講，案底纍纍嘅壹淫媒又違法，今次係粗暴侵犯藝人私隱線！
兩份雜誌嘅違法行為簡直人人喊打，其中一個受害者係電視當紅小生黃宗澤，以為喺屋企無拘無束大解放應該冇問題啦，點不知狗仔隊由外至內偷偷拍攝全裸照，並且刊於《忽然1周》封面，乜鬼私隱都冇晒咯。另外兩個苦主係藝人陳自瑤同王浩信，慘被《FACE》偷拍室內親熱照，事後陳自瑤形容自己「好似被強姦」。既然私隱線被粗暴侵犯，當然據理力爭討回公道啦，三個藝人舊年去到私隱專員公署投訴。
正如私隱專員蔣任宏話齋，拍攝照片等同收集個人資料，以不公平方法收集資料違反保障資料規定。壹淫媒本來企圖以「公眾利益」作為狡辯藉口，話人哋否認同居係講大話，所以有必要向公眾披露真相咁話喎。其實，呢啲根本唔係乜嘢公眾利益，係花邊新聞就真，壹淫媒狡辯嘅理由簡直九唔搭八。
既然壹淫媒又違法，而且係全港首宗由於偷拍而被裁定違反私隱條例，應該點樣處置呢？私隱專員公署已經發出執行通知要求糾正，如果拒絕執行即屬刑事罪行，將會交由警方執法，最高罰款五萬元以及監禁兩年。
本來呢，私隱專員公署終於出手儆惡懲奸，實在應該拍爛手掌，正如香港演藝人協會話齋，對於裁決極表歡迎。之但係功夫茶心裏有個謎，難解，難計。呢一個謎就係，喂，壹淫媒夠違反《淫褻及不雅物品管制條例》過百次啦，有邊一次嚴懲重罰以收阻嚇作用？次次都係包庇縱容刻意放生。所以咯喎，功夫茶擔心今次嘅結果都係一樣，壹淫媒繼續得到港英餘孽撐腰，粗暴侵犯藝人私隱線都可以逍遙法外。
講真吖，利用長鏡頭以及放大器偷拍已經算斯文㗎喇，記唔記得壹淫媒記者曾經擅闖女藝人酒店房間呀？咁缺德嘅行為都做得出，如果當局雷厲風行依法辦事，唔知幾多人要踎監咯！
嗱，私隱專員公署表面上係做番一齣好戲，裁定壹淫媒違法係冇錯嘅，問題係千祈唔好虎頭蛇尾，萬一又係高高舉起輕輕放低，淫賤黎只會繼續奸笑，香港必然繼續沉淪！