夕陽政府仲有三個月就收工，有幾多現任司、局長留任仲係未知之數，但被本報揭發貪盡海陸空嘅煲呔曾就好明顯已經無心戀戰，hea住等收工，佢今日開始至下月四日仲會離港休假添。最奇怪係，煲呔曾休假期間，適逢喺海南島舉行一年一度嘅博鰲亞洲論壇，慣例會有國家領導人出席，煲呔曾寧願休假都唔出席論壇，莫非佢連領導人都懶得見？
煲呔曾休假期間，出席博鰲論壇嘅責任就改由政務司司長林瑞麟（林D9）頂上，由於林D9三十日傍晚會離港，四月三日先返港，呢段期間財爺鬍鬚曾就會頂住做署理特首，而政務司司長個位就由食物及衞生局局長周一嶽署任。咁啱佢哋幾個喺下屆政府都未必有得留低，依家署任總算畀佢哋有機會過吓癮，估唔到煲呔曾臨執包袱前都益自己友威番次喎。