前民政事務局常秘「媽打」李麗娟退休後嘅生活多姿多采，最近佢又嘗試一個人生新體驗，就係開咪做電台節目主持，專訪名人包括粵劇名伶龍劍笙、著名電影導演張婉婷、前高官黃錢其濂等五十位傑出女性，首集節目將於下月初開播。
媽打話，應承做呢個節目係因為要慶祝佢哋一班高級女性公務員，成功爭取與男性一樣嘅權利滿三十周年。一向口齒伶俐嘅媽打，開咪冇難度，所以無乜甩轆場面，最難忘係訪問社會運動家杜葉錫恩，皆因杜太係佢嘅偶像嘛。
媽打又自爆，日日都會喺公共交通工具上被市民叫佢做「契媽」，佢笑稱：「連七十幾歲男士都咁叫，我點嫁得出！」有次有位後生契女話佢知，好想同佢一齊做義工，於是媽打就叫佢一齊嚟開咪，所以日後節目間中會出現年輕主持人幫手o架。