政情：曾鈺成認唔出扮財爺長毛
社民連立法會議員梁國雄（長毛）一向係會議廳內嘅示威常客，嗌口號、掟蕉、放氣球乜都有佢份，畀人趕出會議廳可以話係家常便飯。尋日立法會審議財政預算案修正案，長毛又搞新意思，戴住印有財爺鬍鬚曾個樣嘅面具，又用手銬扣住對手，諗住向鬍鬚曾示威。點知立法會主席曾鈺成唔認得長毛，仲用「呢位議員」稱呼佢，叫佢唔好戴住面具開會，搞到長毛無奈苦笑。
話說大會開始時，長毛就着晒全副裝備入坐，諗住諷刺預算案係官商勾結嘅產物。唔知係咪會議廳太大，坐喺主席位嘅曾鈺成認唔出變身後嘅長毛，於是佢就話：「呢位議員，請你唔好戴住面具！」聽到主席咁講，長毛就立即乖乖咁除低個面具，等主席可以認清楚佢個樣。主席後來解釋，戴面具開會並無違反議事規則，佢只係想搞清楚扮嘢嘅議員係咪真係長毛喎。
