政情：小人當道十年早有預示
十五年前，三十幾個市政局議員為紀念回歸，喺中環大會堂埋下一個時間囊，約好咗十年後，即係○七年打開時間囊回味一番，可惜埋下時間囊幾年後，呢三十個議員就慘遭「拆局」所害，深埋地底嘅時間囊一直出土無期，令佢哋對回歸嘅期許從此被消音。呢個時間囊尋日終於出土，原來內有一段《易經》卦文，一早預示香港會小人當道、民不聊生，唔通係有人因為唔想卦文喺○七出現，所以要搞到時間囊今日先至出土？
《易經》卦文 不幸言中
話說回歸前寶蓮禪寺外嘅寶鼎喺運送期間折足，前市政局議員黎學廉特意為此起卦，卦文大意為小人當道，民不聊生，而黎學廉就將節錄卦文放入時間囊，尋日前市政局議員胡志偉代為讀出卦文時，亦不禁感嘆一句：「不幸言中」。雖然支卦無講「小人」係邊個，但時間囊原定喺○七年開啟，咁啱當年係煲呔曾連任，莫非佢就係長埋時間囊嘅黑手？唔想支卦文影響佢連任？
喺九七呢個極具政治意味嘅年代，不少議員放入嘅物件都代表對回歸嘅感受，例如司徒華就放咗國殤之柱嘅圖片，陳若瑟同孫啟昌不約而同放咗《基本法》入時間囊，鍾樹根就放咗第一屆選委封套。而杜本文就放咗隻風箏，上面寫住嘅文字已漸漸褪色；而放咗「政治審查」口罩嘅吳永輝同胡志偉都不約而同感嘆，估唔到十五年後，情況依然。另外，所有時間囊物品將會喺四月一日至九日，喺大會堂展出。
尋日咁多位前市政局議員聚首一堂，不忘大數「拆局」禍害，令地區政策難以推行。不過，看透世事嘅前市政局主席梁定邦就話，依家都無謂再諗政府當日拆局嘅種種原因，梁定邦仲暗諷話，相信食環署及康文署兩位署長一定做得好辛苦，至於佢同一班前市政局議員，多得兩位署長，依家佢哋先至可以好悠閒咁搞下「小圈子」敍舊喎。