中環出更：董太愛夏姿中西合璧
城中畀面派對多，事業型嘅名媛一日趕幾場，最怕同人撞衫。帝皇翡翠行政總裁董吳玲玲有妙招，就係幫襯設計師品牌，加上創意無限嘅Mix & Match，包保穿出自我風格。日前董太出席一個活動時，就着住台灣知名時裝品牌夏姿（SHIATZY CHEN）出品嘅無袖連身裙，花花圖案細緻、層次分明，加上自己配襯嘅黑色衫及legging（緊身褲），簡潔中見巧思。
北上掃貨避撞衫
董太話，已經幫襯夏姿好多年，好欣賞佢中西合璧嘅設計風格，而且做工細緻又有特色。每逢佢到上海、北京出差時，就會搜羅當地具特色嘅時裝，咁就無咁易同人撞衫啦。
經常中港兩邊走嘅董太話，卸任仁濟醫院主席後更加忙，因為佢接任晉江同鄉會會長，連放假都無得休息，好彩公司有老公撐住。佢正打算四月下旬舉辦千人齋宴及派福米，七月又會率團返晉江尋根，以加深兩地交流。