中環出更：專資會「梁粉」做官各有盤算
政商界都紛紛討論下屆政府新班子嘅組成，咁啱尋日專業及資深行政人員協會第六屆理事會一眾高層同傳媒聚會，全場焦點就放晒喺該會多名「梁粉」會員身上。不過，唔係人人都恨做官，好似前會長胡曉明（Herman）就自嘲「無文化」，話自己唔適合做官喎。
黃友嘉大耍太極
Herman話，當初幫梁振英（CY）助選，講明選舉完畢後就會功成身退，如今亦無意做官，就算入行政會議都唔啱佢，但講到推薦專資會才俊畀CY，就好樂意。查實Herman六月將榮升做老爺，留學美國嘅大仔胡正德結婚，睇怕Herman疊埋心水等抱孫居多。
同樣有傳會入政府嘅專資會副會長黃友嘉（David）就話：「我答話會考慮，會被人以為我恨做；答話唔考慮，又好似好高竇。」即係點？大家揣摩吓啦。曾為CY站台嘅副會長周伯展都有份，係咪真？周醫生直言：「唔敢想創個心！」
講番新會長謝偉銓（Tony），四月初將帶隊考察湖南，而Herman自薦做導遊。Herman稱得上係「湖南通」，單係張家界，已去過十幾次，熟晒路。同場仲有創會會長容永祺，見佢右手尾指包住紗布，原來月前被公司門夾傷裂骨，現已逐漸痊愈。
卓妮