下屆特首誕生，港府改朝換代，人稱「每周一鑊」嘅食衞局局長周一嶽成為頭號被叮大熱。如果傳聞屬實，成個醫療系統就有救咯，香港人就有運行咯，到時一定要開香檳慶祝！
話時話，周一嶽如果跟住煲呔曾執包袱落台，都算有迹可尋，事關呢對官場主僕真係好鬼合拍o架，為官一樣渾渾噩噩，施政一樣混混帳帳。嗱，周一嶽搞到公營醫院烏煙瘴氣，醫生病歷呈報漏洞百出，就係例子嘞！
東區醫院早前有靚仔外科醫生自殺，後來被揭身染愛滋病，一併揭破當局對醫生病歷監管患有後天免疫缺乏候群症，醫護人員就算染上高風險傳染病，亦冇硬性規定呈報，變相自動放棄防疫功能，將病人暴露喺感染風險之中。最離譜嘅係，周一嶽居然以病人感染風險低為藉口，拒絕主動追蹤相關病人係咪已經受到感染。
好嘞，負責調查事件嘅委員會經過連日研究，終於得出最後結論，狠狠摑咗周一嶽一巴。委員會建議，追查有被自殺醫生感染風險嘅病人，例如接受開刀手術，涉及一百四十人。
委員會嘅結論反映乜嘢呢？反映周一嶽為官瞌埋眼講說話囉。仲有呀，周一嶽早前仲死撐，狡辯當局冇規定醫護人員呈報個人疾病紀錄，係為咗保障私隱喎。
功夫茶有時好懷疑，周一嶽後生時係咪染上重症病懵咗，只係一直無向上級呈報，以致今日有機會作亂杏林，為禍香江。當局對醫護染病疏於監管，貼身照顧病人、診治病者嘅人，話唔定就係傳播疫症嘅帶菌者，咁做同搵病人嘅健康安全較飛有乜分別？
醫護病歷涉及病人健康安全，公眾利益唔係應該凌駕個人私隱咩？舉例講，患心臟病都係私隱嚟o架，如果飛機師患病又唔使呈報，萬一喺萬丈高空突然病發，航機陷入無人駕駛嘅險境之中，搭客咪命仔凍過水？如果周一嶽碰啱係搭客之一，又會點諗？可見「周渾噩」嘅私隱論根本狗屁不通。
咪話功夫茶踢爆，當局冇硬性規定醫護人員呈報染病情況，根本係失職，歸根究柢，病源就係醫療官僚冷漠麻木，對病人嘅健康安全闊佬懶理，毫不關心。公營醫院呈報機制一塌糊塗，周一嶽話之你；私家醫院爆醫療失誤，當局一樣唔會透露係邊間私家醫院，話之你有幾多病人盲舂舂誤入閻王殿。當局黑箱作業欺瞞公眾，餐餐攞私隱作擋箭牌，仲有冇新鮮啲嘅藉口呀？
所以話啫，周一嶽係咪黃綠醫生唔敢講，但一定係靠害病人嘅黃綠官僚，成個公共醫療系統畀佢搞到五勞七傷，病入膏肓。
功夫茶奉勸周局長一句，七月一日跟埋煲呔曾自動消失啦，無謂要市民上街趕你落台咁羞家吖！