新舊政府交接工作即將展開，候任特首梁振英（CY）尋日走訪多個地點，包括香港嘅民意機關立法會。雖然CY都唔係首次去立法會新大樓，但今時唔同往日，尋日係以候任特首身份到訪，點知佢離開無耐，立法會大樓就爆水喉，又會咁啱嘅？莫非新官嗰幾把火勁得滯？
今個月二十號，CY未當選時都去過立法會新大樓，出席西九設計比賽事件專責委員會研訊，嗰次CY留咗喺新大樓四個幾鐘，全程乜事都冇。但尋日佢再以候任特首身份去新大樓時，只係匆匆逗留咗二十分鐘左右，佢走咗之後半個鐘，新大樓就突然爆水喉，一爆就爆咗個幾鐘添，搞到新大樓無水沖廁。
好彩水務署即刻派人到場緊急維修，到晏晝四點半鐘左右就修理好，恢復供水。
話時話，CY下個月又會去新大樓出席西九研訊，唔知到時新大樓會唔會有咩頭暈身慶發生呢？