政情：莫樹錦朝朝晨運保身形
最近天氣變化無常，好多人都捱唔住病咗，人稱「靚仔醫生」嘅腫瘤科名醫莫樹錦，自爆保健獨家秘方，就係每日朝早食早餐前，到戶外行半小時至四十五分鐘，加上每星期兩次去健身室做運動，平時就無咁易病喇。難怪佢年逾五十歲，身形仲Keep得咁fit。
莫醫生前日以特首選委身份到灣仔會展票站投票，講起佢日日晨運嘅習慣，原來係八、九年前囡囡仲讀緊小學時，朝朝早六點幾鐘就要返學，佢送咗囡囡上校車之後，自己就喺屋企附近行路當運動。依家囡囡已經讀大學，佢依然保持呢個習慣，多年來真係無乜大病，但最重要係身心健康。莫醫生嚟緊四月份有排忙，佢將會去歐洲及多倫多開會，順便探望囡囡，到時幾乎有成個月唔喺香港。