政情：CY金句 肥胡即學即用
梁振英（CY）當選特首後，預料政府問責團隊將會大執位，好多公營機構都可能換人，當中包括力挺唐英年做特首嘅醫管局主席胡定旭。肥胡嘅任期到年底就完結，無得留任都唔出奇。肥胡尋日出席醫管局中醫教研中心開幕時，問佢會否留任及會否擔心被「秋後算帳」，佢就話唔擔心，而且釋出善意。
肥胡坦言，佢已服務社會廿幾年，有機會都願意考慮喺唔同崗位服務社會。肥胡咁講，似乎有心留低，唔排除同CY有合作嘅可能性。但肥胡一直係「挺唐悍將」，上述言論算唔算係「跳船」投靠CY呢？肥胡就耍太極話：「呢啲係人哋嘅意見，唔作評論！」佢又引用CY當選特首後嘅名句，話如今已經再無「唐營」、「梁營」之分，只有「香港營」喎！