政情：中環出更：菁英聯歡晚宴 俊男美女驚現
中華總商會青年委員會等六個商會嘅後生仔女，日前喺銅鑼灣富豪酒店搞咗場聯歡晚宴，城中菁英空群而出，身兼全國青聯副主席嘅新世界發展第三代接班人鄭志剛（Adrian）都現身撐場。
Adrian着住一件深咖啡色圓領T恤配襯淺灰色牛仔褲，再加件淺色西裝，同鍾意着波鞋襯西裝嘅爺爺鄭裕彤，品味一樣盡顯個人風格。
鄭志剛忙學嘢快閃
當晚Adrian短暫現身，儀式完畢後就急急腳離場。佢啱啱喺三月初升任集團聯席總經理，同接任主席職位嘅爸爸鄭家純齊升職，被外界視為鄭家換班交接，Adrian自然忙得不可開交。佢同卓妮講，最近忙緊學嘢，謙稱仲有好多嘢要學喎。卓妮見佢笑容開懷，一貫淡定作風，工作實難唔倒佢喇！
現場仲有好多靚女，包括潮州商會青委副主任林月萍、蔡敏思等「家己冷」，佢哋密斟嚟緊五月到汕頭大學嘅文化之旅。腹大便便嘅中華廠商聯合會青委主任顏明潤都喺度，佢話月底就生得，今胎又係囝囝，決定生完就收工。
當晚現身嘅仲有中華出入口商會青年部主任李美辰、中國企業協會青委主任陳沛良、嘉應商會青委主任張宏基等。潮州商會會長陳幼南、中總副會長方文雄、廠商會副會長顏吳餘英亦與年輕人打成一片。
卓妮