【本報訊】多名市民昨日致電電台評論候任特首梁振英，有「挺梁」市民認為反梁陣營及「恐梁」市民應接受現實，與梁合作搞好香港，「起碼畀機會佢試吓，做到唔得先反佢！」但亦有人質疑梁振英聲稱不知道中聯辦力撐他，是「擘大眼講大話」。
市民袁太昨致電電台指出，梁振英一直沒機會表現其施政能力，市民應「畀個機會佢」，「等如一個家庭，佢未做就兩父子打架，佢係好慘！」周先生盛讚梁振英成功勝出一場「逆境波」，呼籲市民不用對梁過度驚恐：「贏到呢一場逆境波真係唔容易，香港人唔好咁驚啦，依家都無做過咩出嚟！」
余先生認為，「佢（梁振英）係有才略，豬（唐英年）唔得就唔得啦！對住外國元首，個腦轉慢啲都唔掂啦！佢（梁）奸極，都會諗啲嘢幫香港人做吖嘛。」葉小姐更指，「其實唐英年身邊都有好多狼！」張小姐則表明不滿梁表現，指中央及中聯辦在競選過程中幫他一大把，但他竟然說不知道，是「擘大眼講大話」，她將會上街抗議。
網民方面則以批評梁振英居多，不滿梁一當選即到訪中聯辦，行為等同「謝票」：「做得好，識得認邊個先係主人，呢啲先係叻人！」有網民則改圖揶揄梁昨與曾蔭權會面是想學「貪腐」。落選的唐英年被「喪插」多月後終獲同情，呼籲唐珍惜妻子郭妤淺。