香港自詡係國際金融中心，有乜過人之處好難講，但有一樣嘢肯定傲視全球，呢樣就係空氣污染喇！呢嗱，有海外傳媒最近將香港封為「最受污染嘅國際金融中心」，簡直臭名遠揚，其他地區望「塵」莫及！
煲呔曾上任七年，香港天空長治久污，空氣質素持續惡劣，港人早就忍無可忍，估唔到香江「污名」傳海外，連外國人都忍無可忍。嗱，海外傳媒發表文章，狠批煲呔曾上任以來對改善空氣污染毫無建樹，反而進一步將香港打造成「最受污染嘅國際金融中心」。文章仲訪問咗唔少在港外籍人士，不論大學教授，定係金融專才，人人有口皆呸！
煲呔曾有花名你叫，「氣候逃犯」，佢平生最叻兩樣嘢，一係翹埋雙手唔做嘢，一係卸責抵賴。佢將香港變成臭港，佢可以唔理港人點講，但係家陣連外國傳媒都睇唔過眼，同佢埋單計數，佢唔會又賴海外傳媒「無中生有，惡意中傷」吖嘛？喂，貪曾醜聞被連番踢爆，煲呔曾搞到要扮喊認衰，咁羞家嘅場面獻世一次就夠，唔通佢又想試多鑊？
其實，香港人叫煲呔曾「氣候逃犯」，已經好客氣。早前有報告指出，過去七年本港總共有七千二百幾人因為空氣污染問題而提早死亡。正所謂，佢不殺伯仁，伯仁因佢而死，你話喇，佢又點只「氣候逃犯」咁簡單！
話時話，空氣污染固然令人擔憂，家陣成個香港被煲呔曾搞到烏煙瘴氣，先至係大件事。空氣污染仲可以諗辦法解決，但官場污染咯喎，對香港造成嘅長遠傷害，簡直難以彌補。大家知啦，廉潔係香港嘅核心價值，貪曾醜聞震驚國際，本港廉潔招牌蒙污，香港想唔加速沉淪都幾難。官場污染甚於空氣污染，佢一手摧毀本港廉潔同法治，直情係罪無可恕。
弊在香港政壇沆瀣一氣，既有「香港第一貪」，仲有一班天下第一擦鞋議員。立法會日前動議引用特權法徹查貪曾醜聞，保皇政客居然與民為敵，聯手否決動議，鬼神不分，是非顛倒。
貪官一日逍遙法外，香港一日難脫離烏煙瘴氣。講到呢度，功夫茶想問各位保皇議員，唔通你哋真係想見到香港淪為官場最受污染嘅國際金融中心？如果唔想，你哋仲有補救機會，就係支持彈劾煲呔曾，將貪官趕落台，如果你哋仲係冥頑不靈，小心九月立法會選舉被市民趕走嘅就係閣下！