龍豬引火焚身，炸彈亂投，無視行會保密原則，違規狂吠，躁狂成咁，原來自知大勢已去，由「一定贏」到承認對手CY「真正有機當選」，其心情之沮喪，其失落之難堪，直如瘋狂跳樓機，吾人可以想像！
然而，如果龍豬有多少修養，深明退一步海闊天空，就唔會搞到「自絕於人民和黨」。喂，選唔到唔使死，更唔會一天都暗晒。《三國演義》中諸葛亮罵王朗：只可「潛身縮首，苟圖衣食」，王朗不為一個讀書人的本分活着，也許因為窮得沒有衣食，其情可憫。
之不過，以龍豬之「命好」，唔憂衣食，只憂今年氣候差，生產唔到好嘅紅酒，既不需「苟圖衣食」，又何需滿肚「谷氣」，躁到便秘，一如同文話齋：「有錢就搵，有女就滾」啦！
原來權力不單止是春藥，更是迷藥，要不然龍豬又豈會不顧後果，引火自焚？
《易經．繫辭》說：「吉人之辭寡，躁人之辭多。」西方哲學家維特根斯坦亦指，「凡不可言說者，必保持沉默」。可見，此種「辭寡」，並不代表精神貧乏，而是一種臨水而思的靜觀默察，是來自於內心深處的黃鐘大呂，於無聲處聽驚雷。
老朽睇見龍豬一反常態，當知「人蠢冇藥醫」係至理名言，人哋都叫你「賽後坐低飲啤酒」，你卻一副紈袴公子氣，話「自己只歎紅酒」，完全唔明乜叫做「共振理論」，抵你焚身以火！