每年復活節長假期都係啲高官外遊嘅好時機，但今年復活節就似乎唔多覺有高官放假，反而近年甚少放長假嘅保安局局長李少光，就攞咗一星期大假，真係爆出個大冷門。尋日政府憲報公告，光哥會喺本月三十一日放到下月六日，期間局長職務由副局長黎棟國兼任。
○八年泰國包機事件發生期間，光哥因為到日本公幹，保安局無人擔大旗，阻慢救援行動，結果孭晒鑊。自此光哥變成驚弓之鳥，唔敢放大假外遊，就算後期有黎棟國擔任副局長，佢都只係敢放三至四日大假，到內地打吓高爾夫球輕鬆吓，諗住有乜突發事情都可以及時趕返香港主持大局。
其實黎棟國喺處理菲律賓人質事件上贏盡口碑，相信光哥大可以安心放假。隨着夕陽政府就快完結，相信明日亦好大機會選出新特首，加上有傳光哥做埋今屆就會功成身退，都係時候放假適應定啲退休生活喇。