政情：施榮忻酒莊告設計公司
「百仁基金」主席施榮忻（Jaime）同友人合資喺灣仔開設嘅「老佛爺酒莊」（Vin Lafayette Gallery），尋日入稟高院，控告一間室內設計公司違約、誤導及疏忽，並索償逾六百七十萬元。據講間酒莊係一併經營私房菜生意，遂聘請一間設計公司擔任裝修及設計嘅顧問，但最終因為酒莊內有地台設計，不利傷殘人士使用，所以未能取得飲食牌照，因而令酒莊蒙受損失。
「老佛爺酒莊」係Jaime喺○八年同全國青聯常委林富強及菁英會秘書長王文博合資二千多萬元創辦，該酒莊面積約一千多呎，內部裝潢設計高尚優雅，大部分藏酒均來自法國一級酒莊。
而酒莊內仲開闢一間三百多呎嘅多用途房間，供客人一邊品酒，一邊享受私房菜，但至今幾年仍未達標，Jaime都打算做到本月底租約期滿後唔再續約，已另覓地方繼續經營。