政情：史泰祖搶先表態撐CY
經過一輪業界調查，醫學會十五個特首選委尋日終於表態會全數投畀特首候選人梁振英（CY），當中包括皮膚科醫生，新民黨嘅副主席史泰祖。不過，新民黨今早先至開會決定黨內六張選委票嘅投票意向，但史泰祖尋日已搶先表態挺梁，莫非佢獲得新民黨豁免，可以自由投票？佢笑笑口話，醫學界做得業界調查，佢就要跟結果投票喎！
史泰祖又話，如果選舉真係流選，新民黨一定會全力支持自己黨主席葉劉淑儀參選特首。對於有傳梁營早前向葉劉招手，想佢重返官場擔任政務司司長（CS），史泰祖就話要待該黨開會後先可以決定。
但佢就舉腳贊成葉劉出任CS，仲話葉劉嘅能力同民望都勝任有餘喎。嘩，講到咁明，唔知史泰祖係咪認為葉劉做咗CS後，九月立法會選舉港島個位就可以由佢披甲上陣呢？