政情：唐唐四度擺老婆上枱
特首選戰明日就會揭盅，候選人梁振英（CY）勝券在握，至於對手唐英年就希望力挽狂瀾，尋日喺多份報章上刊登兩個全版廣告，除咗搵來唐營星級助選團成員及幾位聲稱係市民支持者嘅留言外，更第四度擺老婆郭妤淺上枱，寫一大段文字為佢猛講好話，佢自己就隻字都無交代過，而兩人嘅合照，佢更係頭耷耷企喺老婆隔籬，莫講話選委，相信無票嘅市民睇完都未必動容啦。
回想當初，外界一直以為唐唐穩操勝券，可惜期間醜聞不絕，包括感情缺失、九龍塘大宅僭建風波、私生子女傳聞等，但佢不斷以唧牙膏式回應，仲以一個大話冚一個大話，最弊係先後幾次推老婆出嚟打悲情牌博同情，結果被外界狠批佢無腰骨、無膊頭。原本以為唐唐被人咁鬧法會做番個男人大丈夫啦，但點知佢尋日第四度擺老婆上枱，喺報章刊登廣告上撰文拉票。
自己心聲 一句都無
兩版廣告中，第一版係唐營支持者大大幅相再加每人一段數百字嘅挺唐言論，加埋中間大大隻字嘅「為香港好」嘅標題，確實有少少骨痹。至於另一版就係刊載聲稱係市民對唐唐嘅心聲，包括「小市民」、「楊先生」、「王先生」等嘅留言，其中一段由署名「香港市民」以英文寫嘅留言，更係衝住對手CY而來的，但佢自己嘅心聲就一句都無，有幾大誠意一眼睇晒。
不過，最差就係繼續要老婆再次粉墨登場撰文撐自己，內容大意係講番呢個多月嚟嘅醜聞同風風雨雨，佢有幾支持老公等等，大部分內容都係講過晒嘅，而刊登嘅一張合照，係兩人耷低頭對住隻狗，而唔係大方面對選委及群眾。明日就係投票日，唐唐尋日先至刊登廣告力挽狂瀾，有幾大作用，相信佢自己心裏有數。