立法會議員為自己爭取加薪真係叻到冇人有，開天索價一嘢就話要加薪一倍，結果落地還錢成功加薪一成。咁樣自求多福簡直挑通眼眉精甩辮啦，由「極之離譜」嘅加薪一倍變咗「非常蝕底」嘅加薪一成，成班議員變咗唔係貪得無厭，反而十足一個賢良淑德好家嫂。
既然有幸超越打工一族嘅平均加幅，議員係咪應該唔好再做遲到早退瞌眼瞓嘅大懶蟲呀？係咪應該扮都扮到勤力工作呀？呢嗱嗱嗱，家陣有一項神聖任務交託各位尊貴議員，如果繼續辜負納稅人期望，甚至犯眾憎與民為敵，唔好怪功夫茶心腸狠毒，小心出糧食飯骾到嘔白泡呀！
神聖任務係咁嘅，曾蔭權毫不避嫌接受富商款待吖嘛，海陸空3D立體舔到盡，立法會建議討論呢一連串「曾商勾結」有冇影響公務員團隊士氣，預計最快下月中舉行。公務員事務局局長俞宗怡就話嘞，如有需要討論將會配合，政府重視公務員誠信問題。
對於呢一場「批曾大會」，工黨議員李卓人認為，煲呔曾接受款待一方面受到公眾關注，另一方面令到公務員覺得不公平，有需要邀請公僕團隊表達意見。公民黨議員吳靄儀仲話，過往有公務員與利益衝突人士見面而接受紀律聆訊，甚至失去退休金，曾蔭權所作所為令公務員憤怒。
即係咁，麻煩議員秉公辦理，唔好再私心枉縱。冇錯，立法會有好多保皇黨，又有好多擦鞋仔，全心全意討好煲呔攞着數，問題係呢一壇「曾門酒肉臭」實在茲事體大，關乎廉潔法治嘅核心價值。你知啦，貪腐好比癌細胞，一旦擴散遺害極大，你唔去剷除「香港第一貪官」，萬一受到感染嘅貪官污吏愈來愈多，香港淪為不宜人居嘅第三世界都有之！
仲有一樣嘢唔好忘記，貪曾所作所為有辱中央門楣。世界衞生組織《煙草控制框架公約》講明，政府官員不應接受煙草商款待，以免造成利益衝突，偏偏煲呔曾就同香港煙草有限公司主席何柱國過從甚密，乘搭何氏名下超級遊艇吃喝玩樂，而且過夜留宿做咗閨中密友。中國作為簽署《公約》嘅締約方，效力引伸至香港同澳門。難怪吸煙與健康委員會前委員勞永樂咁樣講：「中國一向都遵守國際公約，但來到特區，一個小小曾蔭權令中央千年道行一朝喪，令中央丟臉！」
所以話啫，現已變成憤怒鳥嘅公務員固然有必要出席下月批曾大會，議員更加責無旁貸有必要掃走貪曾，還香港一個廉潔奉公嘅原有形象。假如議員加薪之後仍然放任曾商勾結禍港殃民，莫講話對香港人唔住，連阿爺都無法交代啦！