豬狼大戰，去到尾聲，只見子彈橫飛、炸彈亂投，使旁觀者睇到全城亂碼，選戰亂局，不忍卒睹！龍豬「政治自殺」後，可謂「自絕於黨和人民」，可是，他一錯到底，翻盤無望，又惡人先告狀，賊喊捉賊，表示已向廉署備案，又稱已發律師信予CY要求撤回言論，公開道歉，仲揚言歡迎CY告佢誹謗！
講真，出得嚟參選，預咗畀人插、畀人抹黑，作為公眾人物，多少要有「入水唔怕濕，食魚唔怕骨」嘅心理準備！
之不過，龍豬喺提不出證據下，向對手亂投兩顆深水炸彈，咁搞法，同唔瞄準目標就亂槍掃射冇乜分別，結果敵方安然，自己重傷垂危，政治路途，想唔吊吊揈都唔得！龍豬將「陳年舊噏」攞出來當秘笈，喺存亡危急之秋才來「揭弊」，忽然「良心發現」，說甚麼因今次「關乎港人利益……言論及集會自由為本港核心價值，因此公眾利益應凌駕於保密要求之上」！
忽然「民主」，忽然「愛國」，忽然關心「公眾利益」，都令人打冷震和嚇出一身汗，知來者不善！龍豬忽然對「公眾利益」咁大反應，扶貧就唔會愈扶愈貧、窮人愈來愈多喇！毛澤東說：「聰明、老實二義，足以解決一切困難問題……聰謂多問多思，實謂實事求是。持之以恒，行之有素，總是比較能夠做好事情的。」龍豬持之以恒的，應是品紅與風流！是一般男人窮一生追求唔到嘅成就。