政情：梁太嘉許180義工同事
將於五月退休嘅恒生銀行副董事長兼行政總裁梁高美懿，過去一直好鼓勵員工閒時做義工回饋社會，原來恒生義工隊去年總共獻出近二萬五千小時服務社群，較前年大幅增加三成，同銀行早前公布嘅業績一樣咁靚，成績大躍進。梁太日前就喺恒生總行博愛堂舉行嘉許禮，表揚一百八十個無私奉獻嘅義工同事。
梁太話，恒生義工嘅服務時數逐年遞升，反映同事們對義務工作有一份熱誠，佢鼓勵每一位同事抽時間參與義工活動，分享回饋社會嘅喜悅同滿足感喎。恒生義工隊喺去年搞咗超過一百項義工活動，包括成立愛心剪髮隊服務長者、招待長者享用中秋午膳、宣揚樹木保育等，於是就做咗近二萬五千小時咁多喇。