政情：中環出更：陳妙蘭整餅 盼苦盡「金」來
名媛躍躍欲試開餅店，近年成為熱潮，前東華總理陳妙蘭（Christina），去年就投資七位數字做「餅后」。做得老闆，佢預咗燈油火蠟、食材樣樣貴，但就沒料到客人可以好似「百彈齋主」、「野蠻女友」咁。餅店開業快一年，個個月蝕錢，但Christina堅持將甜蜜美食與眾同樂，苦辣辛酸，還是留給自己。
生於富裕之家，Christina父親係著名建築師陳百強，家中天天大排筵席請客，從小山珍海味食之不盡，耳濡目染，Christina煮得一手好菜。留學加拿大回港後，佢先後當過時裝設計師及上市公司嘅財務分析師。嫁予前東華總理文肇偉後，家中傭人也四個，少奶生活好寫意。
去年Christina有個朋友喺銅鑼灣嘅餅店做唔住，佢於是拍心口頂咗間餅店，佢親力親為，每晚通宵達旦整餅。不過，辛苦並未有換來讚賞，試過有奄尖客人收到餅後，一句「個餅似垃圾」，在電話痛罵她一小時，唔肯畀錢；亦有客人為了店員忘了為禮餅繫上絲帶，大鬧餅店。
舖租貴轉戰老蘭
Christina坦言因壓力大患上高血壓，十歲兒子Brandon哀求媽媽「唔好做」，但佢認為做人要有始有終，誓要做出一點成績。慢慢地，口碑傳開了，名人客仔愈來愈多。雖然餅店漸上軌道，但近月業主卻大幅加租五成，惟有搬到中環蘭桂坊雲咸街，下月初開幕，卓妮就預祝佢生意興隆啦。
卓妮