功夫茶雖然唔係汁都撈埋嘅電視精，不過都叫做睇過《火速救兵》，講嘅係消防員救火救人嘅英勇故事。忽然之間有一個諗法，《火速救兵》其中一集可唔可以講吓十萬火急之時冇消防員出動嘅古仔呢？
大家可能會話，傻嘅咩！十萬火急有乜可能冇消防員出動呀，咁荒謬嘅情節拍出嚟都冇人信啦！
冇錯，正常而言係非常之咁荒謬，之但係你都唔好話冇可能呀，事關消防處職工總會正在發起按章工作，假如情況惡化落去，真係唔知會發生乜嘢事。
件事係咁嘅，擁有四千五百多名會員嘅消防處職工總會爭取平等工時，要求將每周工時由五十四小時減至四十八小時。管理層討價還價，近日提出五十一小時方案，建議減少夜更人手以縮減工時。問題係，總會憂慮咁做會影響夜間救援，對公眾構成危險，所以點都唔肯收貨。
講唔掂數即係談判破裂啦，消防處職工總會於是推動會員前日開始一連三日按章工作，不參與包括文書、清潔以及保安在內嘅任何非緊急工作。總會話喎，前日當值嘅一千五百名人員之中，有九成響應號召。按章工作牽涉全港七十八間消防局，由於總會會員不參與保安工作，所以部分消防局鎖閘，並且押後參觀活動。
總會家陣正在研究，睇睇要求減工時嘅行動是否有必要升級，包括向立法會同十八區區議會表達不滿，遊行靜坐等等就要視乎事態發展再決定嘞。
簡單咁講，消防不設防，記者去到一間消防局了解情況，直入操場都冇人阻止。
呢嗱嗱嗱，目前就話按章工作啫，話就話不影響緊急服務，不過你知啦，特區政府冇嘢叻，管理失職最耍家，搞到民怨沸騰更加係看家本領，否則曾蔭權都唔會淪為鵝頸橋打小人嘅目標對象啦。若然談判繼續破裂，情況繼續惡化，矛盾繼續尖銳，十萬火急之時冇消防員出動嘅場面冇人敢寫包單唔會成真㗎！
計功夫茶話齋，消防員每周工作五十四小時確係幾鬼死長。當你消防員同公務員睇齊每周工作五天，平均每天即係接近十一小時。喂，消防員肩負救火救人嘅神聖任務，冇理由任得佢哋過度疲勞啫，吓話！
好心消防處管理層認真同下屬談判啦，今次按章工作，下次遊行靜坐，再下一次若然搞到大罷工點算好呢？政府又唔係冇錢，庫房長期水浸，唔夠人手咪增聘人手囉，只要用得其所，市民唔會反對嘅。
總而言之一句講晒，談判不得再破裂，消防不得不設防，事關全港七百萬市民嘅身家性命財產必須得到保障。尤其係今時今日，貪腐醜聞纏身嘅曾蔭權激到全人類眼火爆，萬一禮賓府唔覺意火燭，真係要有消防員出動㗎！