有道是「心態決定境界」，貪盡海陸空的煲呔曾及其班子，一眾問責高官收禮亦無規無矩，貪曾話得就得，「廉潔奉公」就咁喺貪曾管治下一朝喪！
煲呔曾民望，睇怕都唔需要再調查了，因為沒有最低，只有更低！佢留多一日，香港就繼續沉淪下去！講真，香港呢塊土地，已經唔適宜貪曾留低，如果佢稍有自知之明，應早走早着，無謂成為香港人嘅負擔，不！是噩夢！
有資深報人話如果貪曾讀過前港督葛量洪的《過客——香港去來》，從書中知道從英國派來香港的總督如何公私分明，在官場有規有矩，高貴尊嚴來自他的公職而非他本人，一身正氣，嚴以律己，自不會飛揚跋扈，對煲呔曾或許有多少警惕作用！
依老朽看，煲呔曾即使睇過，一樣改唔到好貪縮骨嘅本性，皆因一個人連葵花雞、增城菜心、二手跑步機都貪，花公帑卻碌自己信用卡攞積分……喂！根本成身都流着貪小便宜的血液，十五十六唔貪唔舒服，腐敗就是這樣煉成的！
以貪曾處事賴皮的標準，高官收受禮物，規管係自欺欺人，而申報收受禮物的制度也形同虛設，皆因貪曾其身不正，律己談不上還說甚麼「高貴尊嚴」？視廉潔如浮雲，大家關門一家親，收點禮算甚麼？
《周易》有云：「君子以施祿及下，居德則忌。」大意是說君子時刻為百姓謀利益，但決不以德自居。今煲呔曾縮骨治港，貪到最後一秒，則是「天行健，貪曾以自舔不息」！