特首候選人唐英年未選先失勢，好多唐營人士已開始轉軚，唔敢再撐佢，好似一直硬撐唐唐嘅全國政協常委陳永棋，尋日忽然收晒聲，兩次問佢會唔會投唐唐一票，佢都話無嘢講。眾所周知，棋哥身為政協常委，收北大人嘅風快又準，如今收晒聲，可想而知唐唐選情真係凍過水。雖然棋哥現階段可以選擇保持緘默，但相信最終點都要回應吓個選舉結果，或者係時候要諗定啲講詞喇。
