九月立法會選舉新增嘅五個超級區議會議席，一眾選民已陸續收到有關選民登記通知書，但有政黨收到好多市民投訴，話睇唔明份通知書講啲乜，有人仲話睇到啲字眼係警誡口供嘅內容，仲搞到以為自己犯咗法，如果做選民都好似驚弓之鳥咁，真係幾恐怖。
民建聯尋日爆料話，最近收到最少二百宗有關超級區議會選民通知書嘅投訴，其中有啲字眼包括「根據本處所得資料」、「合理理由」等，搞到市民即時好驚，另又有人發現封通知書用咗好多否定詞，包括「除非」、「否則」、「而又並非」同時出現喺一句完整句子，睇完之後根本摸不着頭腦。
選舉事務處連簡單嘅選民通知書都搞到一鑊泡，點會畀到市民信心登記做選民吖！據聞有人喺去年新春活動上可以做到三、四十個選民登記，但今年同一個活動，選民登記數目就大幅下降到得番幾個，唔通呢個現象就係市民對當局打擊「種票」不力嘅無聲控訴？