政情：陳祖澤出山更上一層樓
天下無不散之筵席，但原來散席後可以相約再食過嘅！好似做咗九巴董事長及母公司載通國際控股董事長十幾年嘅陳祖澤（John），四年前因為到達退休年齡而退任，轉做載通非執行董事，但尋日又再獲載通委任為副主席，喺五月下旬生效。阿John退休幾年後有得再升職，證明載通好重視佢喇。
梁乃鵬升載通主席
阿John由九三年起出任九巴董事長，九七年更加升任載通董事長，直至○八年卸任，轉做載通、九巴及龍運之非執行董事。幾年前阿John為退任解畫時話，公司規定六十五歲退休，所以佢以平常心退下。咁今年六十八歲嘅阿John，點解又可以重返而唔受年紀限制，唔通佢練成返老還童嘅神功？
載通同時宣布，主席鍾士元亦將退休，改由副主席梁乃鵬升任，但梁乃鵬年紀仲大過阿John，今年已七十一歲，所以話依家退休年齡提高到七十五歲，絕對唔係問題。