政情：「小明」新作幫都市人減壓
憑住「小明上廣州」一曲熱爆網絡嘅兒科醫生李家仁，繼上次作咗首「小明做特首」後，又有最新力作「小明與壓力」，呢首新歌係同青山醫院合作，配合手機程式，希望幫助都市人減壓喎。
李家仁為囝囝做柴可夫
李醫生坦言，練呢首新歌時都有壓力，雖然歌詞唔係好長，但要rap（饒舌）嗰段就好多字、好難記，要花腦汁記之餘，又要輕輕鬆鬆rap出嚟，真係十分唔簡單。
李醫生為咗練好首新歌感壓力外，最近佢又為囝囝考末代A-Level頻頻撲撲，揸車接送囝囝去考試，真係廿四孝老竇。不過，雖然佢囝囝修讀理科，但就無打算繼承父業報讀醫科，反而報咗香港大學新聞系，幾年後傳媒呢行又多個生力軍。講開又講，原來李醫生諗過考慮添食，作多首「小明再上廣州」，但礙於「小明上廣州」暫時未能風行全省，所以遲吓先至再上廣州喎。