政情：葉劉爭做「阿二」 明踩雙林
特首選戰尚未結束，但已爆出下屆政務司司長職位爭奪戰。我哋尋日講過，下任政務司司長嘅大熱人選，分別係做過保安局局長嘅新民黨主席葉劉淑儀、「好打得」嘅發展局局長林鄭月娥。報道尋日刊出後，葉太就急急上電台接受訪問，除咗硬銷自己有豐富嘅政府工作經驗外，仲狂踩政務司司長林瑞麟（林D9）同林鄭兩位潛在對手，原來連爭做政府阿二都會刀刀見骨㗎！
近日不斷傳出，民望一向唔錯嘅葉太受到特首候選人梁振英及唐英年兩大陣營青睞，嚟緊有機會搵佢入閣做政務司司長，貪佢有政府經驗之餘，亦參加過直選，真正熟悉香港政治玩法。葉太尋日承認兩大陣營都接觸過佢，邀請佢做下屆政務司司長，但就未有具體安排，佢亦無即時答應。雖然葉太始終唔肯正面回應會否做下屆政府阿二，但聽清楚佢嘅說話，其實可見端倪。
至少要坐司長位
節目主持人問，如果佢加入政府，係咪唔會再吼局長位？葉太答得好白，話自己已經做過局長，暗示要做司長位。佢仲話，依家唔少高官都做過佢下屬，好似林鄭、民政事務局常秘楊立門、公務員事務局常秘黃鴻超、廉政專員湯顯明等：「林太係我升佢、謝凌潔貞（教育局常秘）係我升佢，仲有好多個㗎！」暗示眾人當年得佢提攜先至升到依家咁高位置。
不過，當被要求月旦其他政務司司長熱門人選時，葉太即時話：「唔方便評論，全部都師弟師妹！」但轉頭又話，林鄭係就係人才，不過好多公務員下屬都有微言，擺明就係寸林鄭人緣唔好啦。彈完林鄭，葉太就將槍頭瞄準林D9，話林D9民望唔合格。佢分析話，新特首上場，團隊好重要，如果有高民望嘅官員幫手，施政亦暢順好多。講到底，咪係踩林D9冇資格留低囉。
葉太講到咁出面，林鄭喺另一活動上面黑黑唔肯回應，而林D9就話自己一直有心服務香港喎。既然三位人選都唔肯退讓，唔知新特首會揀邊個呢？