中環出更：盧浩宏 偕同行食盡天下
俗語話「同行如敵國」，但以火鍋起家嘅福苑集團主席盧浩宏（Howard），同行家不知幾老友，由佢擔任主席嘅現代管理（飲食）專業協會，每年都會舉辦美食之旅，一齊嘗盡各式佳餚。Howard日前就約埋該會副主席兼名廚黃永幟一邊食飯，一邊商量今年嘅澳洲及法國南部嘅美酒佳餚之旅。
通脹下 幟哥都要開源
Howard話，去年一行四十人已去過澳洲塔斯馬尼亞，活捉海鮮炮製海鮮大餐。佢大讚當地水質好，海鮮特別靚，隻隻野生鮑魚有成塊面咁大，澳洲龍蝦又大隻，即釣即煮勁鮮味。幟哥就話，最難忘係採摘黑松露，當地人用狗隻嗅覺去搜索，覓得手掌咁大嘅黑松露，芬芳撲鼻。
幟哥過去做開電視節目，每次都為旅程穿針引線，捐窿捐罅搵好嘢食，仲趁機採購當地時令食材返港。今年六月佢打算包架私人飛機去澳洲悉尼，與當地飲食協會交流，十月就去法國南部嘅酒莊品酒，Howard聽到都連聲讚好。
講到通脹令食材價格上升，就連最識做生意嘅幟哥都話要開源，所以旗下酒家引入「忘不了」、巴丁魚等罕有馬來西亞河鮮，吸引新食客。Howard就話開源之餘都要節流，佢已經下令集團旗下所有大廚瞄實啲下屬，唔好長開水喉同爐火，咪睇小呢啲小動作，因為做足既慳錢又環保，一舉兩得。
卓妮