有四張嘢嘅立法會議員陳淑莊（Tanya）自從結束八年戀情後，至今一直未有着落。Tanya尋日出席一個婚紗雜誌舉行嘅頒獎禮上，自爆過去做過四次伴娘，當中仲有唔少難忘經歷。嘩，有傳話做三次伴娘會嫁唔出，Tanya仲做夠四次添，真係大事不妙。
相識滿天下嘅Tanya，原來做過姊妹、司儀，連大妗姐都做過，經驗認真豐富，而做伴娘嗰四次婚禮，就分別係喺香港、澳門同美國進行。佢話伴娘同姊妹裙多數都係度身訂做嘅，所以婚禮後都唔捨得丟棄，放到一屋都係。
講到最難忘嘅婚宴經驗，Tanya話喺澳門做伴娘兼司儀嗰次，主禮嘅神父貌似英國喜劇主角戇豆先生，搞到佢忍唔住笑到踎低。佢仲話，見過有新娘喊到唔夠紙巾用，又見過有新郎哥唔識合巹交杯喎。講到興高采烈，唔知幾時先輪到佢披嫁衣呢？Tanya笑笑口話：「快o架喇，快o架喇！」