煲呔曾貪瀆醜聞不絕，搞到班下屬都無心戀戰，好幾個政策局同部門早前回覆立法會特別財務委員會嘅質詢時，一係就寫錯部門個名、一係就報細數，十億元計嘅公帑寫咗百萬元單位，尋日先至急急腳發出更正，真係離晒譜。
財經事務及庫務局庫務科作為政府內揸數嘅部門，居然兩度報錯數，兩次都係英文版出事，難怪唔係太多人發現。第一次係將上年度約四十萬個非住宅物業嘅寬免差餉額寫成一百六十二萬元，但實際係有成十六億二千萬元咁多，兩者足足差咗三個零頭。第二次係佢哋將支付一筆九百一十萬元嘅費用畀香港郵政，作為派發六千元計劃嘅手續費，點知寫錯咗做九十一萬元，兩者又差咗成十倍。
除咗庫務科報細數，商務及經濟發展局又係咁，佢哋交代旅發局預計今年台灣訪港旅客嘅開支時，將五十八億多元增幅變成五萬八千多元。至於行政署仲搞笑，佢哋表列部門移交檔案畀政府檔案處時，誤將民政事務總署升格做民政事務局，而民航處又好騎呢咁轉型做懲教署，難怪曾班子民望下跌囉。