政情：沈祖堯讚「林瘋」人紅不驕
美籍華裔籃球員林書豪迅速喺NBA打出名堂，喺美國當地同全球華人社會掀起「林瘋」熱潮，連中大校長沈祖堯尋日發表嘅網誌都以佢為主題。
不過，沈校長並非只係單純欣賞林書豪嘅球技，而係讚揚佢無被勝利沖昏頭腦，繼續表現出謙卑唔爭功，值得大家學習喎。
沈祖堯喺網誌中話，有美國運動雜誌估計林書豪嘅身價已經超越前NBA球星姚明同高爾夫球好手「老虎仔」活士，無論去到邊度都大受民眾歡迎，但係佢每次接受電視訪問時，都總係氣定神閒、溫文謙恭，遜稱所有勝利「純粹是團隊合作所致」。喺基督教家庭成長嘅林書豪，每次打完波都會祈禱感恩。
沈祖堯提醒學生，過去喺體育界同演藝界，都出現過好多「盛極必衰」嘅例子，好似活士同一代拳王泰臣咁，如果唔能夠保持頭腦清醒，愛惜羽毛，就好易會畀金錢、虛名同權力誘惑誤入歧途，迅速從雲端跌倒。
佢希望林書豪可以繼續寵辱不驚，虛懷若谷，成為年輕一代嘅榜樣。