政情：司長猛收禮擺檔實大賣
「貪得唔好嘥，貪完拎去賣」呢句說話，相信早已成為煲呔曾貪心班子嘅核心價值，夕陽政府三名司長尋日被本報踢爆兩年來收受近千份禮物，當中有三百多份仲係袋袋平安添。暫時嚟睇，三個司長做埋餘下幾個月任期就會係咁先，既然收收埋埋咁多禮物，倒不如開闢一條以「當奴鴨」為首嘅官僚街道「鴨僚街」，等佢哋下台後攞晒啲禮物去擺地攤出售，實行無本生利。
鬍鬚曾數量冠絕三司
三位司長之中，負責揸數嘅財爺鬍鬚曾收到最多禮物，一○年至今共收到四百四十五份，多年來佢出咗名係孤寒財爺，難怪袋落袋嘅禮物都冠絕三司，總共收咗一百九十份咁多。睇番佢袋落袋嘅禮物，原來只係啲網球拍、網球、玩具，同埋幻燈片遙控器連雷射燈等，照常理佢無可能買唔起，但連呢啲咁濕碎嘅嘢都貪，真係深得佢哎吔兄弟嘅真傳。
鬍鬚曾嘅理念係大小通吃，但律政司司長黃仁龍就唔同喇，佢就有價值先至收。雖然黃仁龍收禮確實唔及鬍鬚曾咁多，只有三百四十二份，但係佢收嘅禮物全部有價有市，好似中共成立六十周年紀念手錶、○九年發行面值一百五十元嘅紀念鈔票，同埋駐港使節送贈嘅靚酒，統統都有升值潛力，若然隔多一段時間再放出街賣，分分鐘賺好多錢。
至於加入政府幾十年嘅政務司司長林瑞麟，都累積咗唔少本錢，佢上任司長只約半年，但就已經收咗一百六十份禮物，幾乎每日都收禮咁滯，佢仲迅速將近六十份留畀自己。
不過，佢收嘅禮物就騎呢啲，例如係護膚品同禮物盒等，莫非係貪嚟送畀老婆用？大家有眼睇，三司為官多年政績不堪入目，但貪小便宜就落力瞓身，真係做得舒適、貪得招積，自然好似貪曾咁遲早仆直。