中環出更：周國豐遇心頭好極速扑錘
社交界名人周國豐（Brandon）自細遠赴英國留學，受到當地文化薰陶，對英式嘅物品情有獨鍾。卓妮上周五下午四點半鐘行開中環置地廣場，就見到西裝骨骨嘅Brandon一支公行入富有歐陸風情嘅家居精品店Museum CONTEXT睇嘢，佢一邊行一邊仔細研究各類貨品，似乎好有興趣咁。
三千元購英式鞋架
Brandon行行吓話咁快就睇中一個手工精緻、價值三千多元嘅木製英式鞋架，諗咗幾分鐘就扑錘，等職員用紙盒同繩包好之後，急不及待一手拎起個鞋架離開。
Brandon話，覺得個鞋架幾靚幾特別，而且又係佢喜愛嘅英式設計，加上全店只係得番一個，佢驚之後會無得賣，所以咪即刻畀錢囉！
記得Brandon喺電台節目《窮富翁大作戰》中做速遞員體驗基層市民生活，當時幾重嘅信件都孭過，相信一個鞋架絕對難唔倒佢。
卓妮見Brandon着嘅修腰西裝同樣甚具英式味道，佢話喺英國居住多年，習慣咗當地嘅生活，返港後都會揀番啲具有英國特色嘅擺設喎。問佢近況如何，佢就話囝囝快高長大，一家三口樂也融融。
Museum CONTEXT係來自蘇格蘭，店舖嘅裝修以木材為主，仲有大大小小嘅舊式吊燈照出昏黃光線，極具復古味道。店主喺歐洲多國搜羅大量仿舊製品，好似傢俬擺設、戰時食譜、歐洲地圖、明信片、旅行用品等，咁有特色，難怪Brandon咁鍾意喇。
卓妮