講真，曾蔭權都算得上係民間傳奇，出身唔係貴族，學歷並不標青，居然畀佢由低處爬起，爬呀爬，爬呀爬，由孤單推銷員變咗特區大當家，環顧港九新界離島冇人夠佢位高權重。再加上同姓三分親嘅九龍皇帝曾灶財已經駕崩，煲呔曾徹頭徹尾就係山寨王。
更加傳奇嘅係，呢一個飲香港水、流香港血嘅香港仔臨天光瀨到一褲都係，距離卸任特首只有四個月竟然晚節不保，貪腐醜聞搞到蜚聲國際，臨落台都掩飾唔到貪婪真面目。如果廉署調查之後夠證據鋤得佢死，鋃鐺入獄肯定為「和曾傳奇」進一步平添姿彩。
經過東方報業集團連環獨家爆猛料之後，「曾商勾結」人盡皆知，貪盡海陸空嘅劣行廣傳千里，除咗引發本土居民萬人空巷上街倒曾之外，散居全球嘅海外港胞都不齒貪曾嘅所作所為。好似旅居台灣高雄嘅港人蔡小園咁吖，貪曾醜聞令佢覺得係過氣總統陳水扁翻版，接受富豪奢華款待以及廉價租住「深圳禮賓府」無法令人接受。台大歷史系三年級香港學生黃俊傑仲話，考慮挺身而出喺台灣發起反貪腐運動，要求曾蔭權為不當行為下台謝罪。
美國華僑又點講呢？曾經出任美國聯邦民權委員嘅香港移民李艷紅，認為煲呔曾年薪高過美國總統奧巴馬，實在唔應該仲要貪小便宜。李艷紅透露，聯邦政府對於所有官員都有明確嘅道德操守規定，價值等同一百六十港元嘅禮物就不能收受。如果按照同一標準，曾蔭權絕對係大貪官，淨係享受富豪提供嘅超級遊艇接載服務兼且留宿過夜，已經遠遠超過一百六十港元利益啦，衰鬼！
正所謂，冇一個坑渠係唔污糟邋遢嘅，功夫茶從來唔相信坑渠老鼠……唔係，應該話係政治人物「比白更白」，問題係好少有人似得曾爵士咁明目張膽，舔到盡仲要厚顏無恥話「問心無愧」。英國華人林玉熊講得啱，曾蔭權落淚認錯嘅表現同做戲無異，政治敏感度低成咁，令到公務員團隊唔少人條氣唔順。
身在他鄉，心繫香港，好多人移居海外都睇唔過眼要向貪曾說不，證明「曾小人」係幾咁令到香港蒙羞。之但係有一個問題真係激鬼死你，任你走去鵝頸橋拎住拖鞋打小人，定係立法會議員召開公審大會群起而攻之，呢一個厚臉神功練到化境嘅貪字輩大師兄硬係賴死唔走，點都唔肯引咎辭職，話要做到最後一分一秒喎，吹脹！
計功夫茶話齋，當初陳水扁都係賴死唔走，不過卸任之後都要受到法律制裁，大家不妨放長雙眼睇睇會唔會出現「和曾傳奇之監獄風雲」。