政情：政助玩Game叻過議員
夕陽政府嘅政治助理不嬲畀人感覺無乜功績之餘人工仲特別高，但佢哋尋日竟然可以喺無國界醫生野外定向比賽中成功奪冠，唔通係因為平時好多時間練習？
贏出名人邀請賽嘅四位局長政治助理包括保安局盧奕基、教育局楊哲安、民政事務局徐英偉同特首辦陳岳鵬。佢哋喺短短兩個半鐘頭內跑得最多check point，最後仲成功攞到冠軍，繼舊年攞亞軍後再下一城。陳岳鵬話，尋日天氣唔算好，又落咗少少雨，活動完全令佢哋體驗到前線醫生嘅辛勞。
相比起嗰啲連名都叫唔出嘅政治助理，一班立法會議員就認真失威。一向玩開長跑嘅梁耀忠雖然表現輕鬆，但佢嘅隊友馮檢基就顯得相當不濟，不但要扶住啲樹嚟行，隻腳之後仲抽埋筋，搞到遲咗半個鐘先至可以返到終點。喺咁嘅情況下，阿忠惟有幫手出貓，預先跑去下一個check point拍卡，等啲隊友可以跑少啲路。