政情：人怕出名 周澄怕失業
有「民主小女神」之稱嘅周澄一向都話自己想去非政府組織、即係NGO返工，尋日佢出席海港青年商會活動，一提起搵工就大嗌頭痛，皆因唔少非牟利機構睇到佢大小姐份履歷，都大叫怕怕，搞到佢搵工搵到依家都仲未成功。
據周澄所講，不少機構唔係覺得佢做唔到嘢，就係嫌佢嘅知名度太高，仲話擔心如果遲啲有活動舉行嘅時候，班記者淨係識得圍住周澄採訪，搞到個活動本身無人理就唔係咁好啦。
至於其他同NGO無關嘅工種，周澄話自己都有試過，但人事部又係一見到周澄份履歷，就認定佢係社運分子，仲會標籤佢係嗰啲淨係識搞事嘅八十後，所以都唔多會考慮佢喎。不過周澄對前景依然好樂觀，話自己依家喺智庫Roundtable幫手做緊政策研究，間中又會喺報紙寫吓專欄，所以暫時都唔使喺屋企量地。周澄仲講笑咁話，過多一陣等少啲人記得佢，就會容易啲搵到工喎。