中環出更：鄭家純嫁女 若得若失

一對新人上午十一點左右抵達君悅舉行註冊儀式，新郎新娘穿上中式禮服，Sonia身上嘅華貴裙褂好搶眼，配埋珍珠鑽石耳環、頸鏈及龍鳳鐲，排場十足。「陪嫁團」別出心裁，除十幾名兄弟、姊妹外，大衿姐更抱埋三隻由一對新人撫養多年嘅愛犬齊齊進場！

彤叔出席婚禮，望再抱曾孫。（徐家浩攝）	純官「掌上明珠」鄭志雯（左）下嫁「鋼鐵大王」後人龐建貽（右），兩家好登對。	一對新人送上青葱小盆栽作回禮。

儀式上，新郎Paulo朗讀愛的宣言，令新娘子感動落淚，Sonia嘅大哥鄭志剛更高歌一曲《When I Fall In Love》賀妹妹，引來掌聲雷動。

新郎新娘家世顯赫，婚禮現場名車列陣。	朱玲玲（左）同兒子霍啟山向一對新人送上祝福。	徐子淇（左）同老公李家誠送上新屋用品做賀禮。（霍振鋒攝）

彤叔畀孫女婿100分

榮升外父嘅純官風騷到場，佢坦言嫁女好開心，不過感動之餘，又覺得若得若失，因為少咗個女，但多咗個女婿喎！

純官又透露送上神秘賀禮。咁佢覺得女婿值幾多分呢？佢笑言：「有九十五分，剩低嗰少少缺點，將來由個女發掘！」Sonia爺爺鄭裕彤就大讚孫女婿值一百分，至於恨唔恨抱曾孫，佢話：「已經有好多個曾孫，再生多幾個都無所謂！」

婚禮嘉賓冠蓋雲集不在話下，會場外更出現「名車陣」。賓客離開時捧住小盆栽，原來係一對新人嘅回禮紀念。

夜晚喜宴喺會展筵開逾百圍，富商紛到賀，包括恒基地產副主席李家誠及太太徐子淇、永遠最美麗港姐朱玲玲同兒子、許晉亨及李嘉欣、玩具大王蔡志明夫婦等。徐子淇透露，送咗新屋用品做賀禮，問佢會否傳授生仔秘笈，子淇話：「唔使喇，佢哋一直好恩愛，恩愛自然好快有小朋友。」

卓妮