距離特首選舉只有兩星期，好多大學都做緊特首民望調查，但我哋日前就收到位讀者投訴，佢話近日收到嶺南大學嘅電話調查，問佢支持邊位特首候選人，但佢一話支持梁振英（CY）啫，調查員就即刻問佢係咪支持CY退選喎。雖然佢即時澄清，但個調查員仍然好似錄音機上身咁，不斷問佢有幾多個百分比支持CY退選，令佢覺得個調查唔夠客觀，好似針對緊某一位候選人。
負責調查嘅嶺大公共管治研究部主任李彭廣回應話，基於兩個特首候選人近月都有負面新聞，所以先會向被訪者問及唐唐同CY應否退選嘅問題。
佢又解釋，問題嘅先後次序係由電腦隨機決定，所以唔覺得調查唔客觀同有引導成分喎。咁就奇怪喎，外間一直只係要求受婚外情及僭建醜聞纏身嘅唐唐退選，但就未聽過要求CY退選，點解嶺大要做晒兩位候選人嘅退選問題呢？