政情：胡葆琳笠頭禦寒風
每年三月嘅北京「兩會」歷時約半個月，面對又乾又凍嘅天氣，一眾港區人大代表同全國政協委員都各出奇謀抵禦寒風，除咗用厚厚嘅禦寒衣物包到密不透風外，有港區政協委員仲用圍巾包裹自己個頭，化身「幪面人」擋寒風，真係創意十足。
全國政協委員前日下午喺北京再次舉行全體會議，但因出席者人數眾多，一眾政協落車後要行一段短路程先至去到開會現場，難免要同又乾又凍嘅天氣正面交鋒，適逢前日北京刮起大風，冇着夠衫保暖嘅政協究竟點辦好呢？
本身係女企業家嘅政協胡葆琳就自創招式，用圍巾將頭包裹以抵禦寒風，都唔知佢睇唔睇到條路，但好彩身邊有人陪佢同行兼帶路，就係有「美容教母」之稱嘅政協鄭明明。據聞明明姐見到北風來勢洶洶亦不敢怠慢，日前已去添置羽絨禦寒，夠晒穩陣。