正所謂「上樑不正下樑歪」，有得煲呔曾呢啲貪官，就連政府部門都唔跟規矩辦事，點解？最近有離島地區人士收到風，話早前不獲政府委任做區議員嘅鄉議局副主席林偉強，極有機會獲離島民政事務處續委任為新一屆坪洲、長洲及南丫島分區委員會委員，質疑佢過去已做分區委員超過六年，再獲委任就有違當局訂下嘅「六六原則」，即一項公職不能擔任超過六年嘅規定。
呢位地區人士批評，林偉強陣營已喺去年坪洲村代表選舉中落敗，更因失落坪洲鄉事委員會主席，連離島區議會當然議員及主席職位都無埋，質疑離島民政處點解要一再幫佢「借屍還魂」。有傳聞話，委任區議員遲早會被取締，當局喺壓力下亦唔敢委任林偉強做區議員，所以打算補番個吉畀佢。話時話，林偉強以前係堂堂區議會主席，如果民政處真係不依規矩委任佢，唔知佢會唔會做呢？