政情：鐵頭仁陪跑攪亂檔
建制派兩名候選人梁振英（CY）同唐英年都係特首熱門人選，相反陪跑嘅候選人民主黨何俊仁（鐵頭仁），起初只係以「塘邊鶴」姿態出現，但近日就有弄假成真之勢，開盡火力攻擊CY外，更聲嘶力竭狠批「黑金政治」。講到尾，有分析話鐵頭仁係想搞亂特首選舉，等建制派撕裂後從中得益，為九月立法會選舉撈取政治本錢。
被外間冠以「唐英年B隊」稱號嘅鐵頭仁，過去幾個月同唐唐一直「眉來眼去」，其中鐵頭仁屢次善待唐唐嘅誠信同醜聞問題，包括「感情缺失」及僭建醜聞都係「高高舉起，輕輕放下」。相反對於CY嘅問題就出盡九牛二虎之力全方位攻擊，更同黨員疑似裏應外合，火力較唐營有過之而無不及，幾近變成「唐英年A隊」。
B隊做咁多嘢，唐唐當然另眼相看大讚鐵頭仁做人有原則啦，搞到前港區全國人大代表吳康民早前都睇唔過眼，撰文暗批唐唐「敵我不分」。雖然唐唐同鐵頭仁兩人不避忌「扯貓尾」行徑認真惹人疑竇，但鐵頭仁未必真心想幫唐唐，其實係立心「抽水」搞亂特首選舉，從中得到最大嘅政治好處。
一箭雙鵰 欲大翻身
最近CY競選辦代表出席有「江湖人士」嘅鄉事派選委飯局惹起關注，鐵頭仁於是開口埋口抹黑話係「黑金政治」，而該黨多名區議員又拉大隊到廉政公署舉報事件。有政界人士分析，如果鐵頭仁成功炒起「黑金政治」議題，加上唐梁之爭令建制派撕裂，市民就會對建制派及特首選舉失去信心，得益嘅自然係泛民主派。
再者，如醜聞纏身嘅唐唐一旦上場，民望持續喺低位徘徊，由佢領導嘅弱勢政府勢必為白鴿黨以至泛民提供源源不絕嘅攻擊彈藥，所以鐵頭仁參選可以講係「一箭雙鵰」，嚟緊九月立法會選舉，必為去年區議會失利大翻身。今次特首選舉亂局，邊個最終得益，選民喺嚟緊立法會選舉，真係要擦亮眼睛認清事實喇。