中環出更：工商界商會春茗 眾會長「黃袍」加身
香港工商界商會早前喺灣仔會展大搞春茗晚宴，該會一於搞搞新意思，五十幾位來自唔同商會及機構嘅會長齊齊着上黃袍，政商界嘉賓則披上金色或紅色中式頸巾，既復古又有新意。籌委會主席、古珀行珠寶總裁沈運龍（Aaron）着黃袍之餘，沈太Alice都悉心打扮招呼賓客。
當晚出席嘉賓有電子業商會會長楊志雄、工業總會副主席劉展灝、中華廠商會會長施榮懷、香港錶廠商會會長蘇永強等。來自紡織、玩具、塑膠及汽車業等數十個行業嘅菁英濟濟一堂，香港大學校長徐立之、理工大學校長唐偉章亦係座上客。
Aaron致詞時趁機為港商請命，佢話創業難，守業難，升級轉型就難上加難，呼籲政府協助港商解決稅例及進料加工嘅稅務問題。