中環出更：唐媽媽怕曝光？ 見鏡頭即匿埋
特首選舉戰況激烈，候選人唐英年前日仲報警聲稱被恐嚇，夠晒娛樂性。咁啱卓妮尋日就喺沙田馬場見到唐媽媽唐尤淑圻，於是問佢會否擔心愛兒安危啦，點知佢學咗前廣播處長朱培慶匿喺艷女CoCo後面嘅伎倆，匿喺同行友人、遠東集團創辦人邱德根太太邱裘錦蘭身後，仲連聲話：「對唔住，對唔住，今日唔好影啦！」
唐媽媽匹愛駒「雙辣」尋日出賽，佢拉埋老友邱裘錦蘭一齊入場湊熱鬧，如常行去沙圈睇馬，一路有傾有講。不過，唐媽媽一見到閃光燈，就即刻匿到邱太後面，邱太仲用手擋住鏡頭，不停話唔好影。唐媽媽驚成咁，唔通佢驚講錯嘢連累到囝囝嘅選情？雖然佢全程唔講嘢默默為愛駒「雙辣」打氣，但最後鋪「雙辣」都係食唔出。
四太話燊哥撐「爆料」
尋日賽事仲有場矚目嘅港澳盃賽，身為澳門賽馬會副主席嘅賭王何鴻燊四太梁安琪都有出席。卓妮問四太知唔知燊哥打算支持邊個做特首，點知佢笑笑口話燊哥支持「爆料」喎！正當卓妮以為四太想爆料嘅時候，佢再指一指馬簿，原來「爆料」係燊哥匹愛駒嘅大名，四太真係識講笑。
卓妮同場仲見到理文造紙主席李運強夫婦，同三仔李文斌夫婦及二仔李文恩太太Lorinda，齊撐李文恩匹駿駒「包裝博士」。不過，匹馬最後都係輸咗半個頭位得第二名，有二十六萬多元獎金，李運強笑笑口話，跑馬係咁架喇，下次再嚟過喎。
卓妮