中環出更：人大政協上京 皮草茅台隨行
北京「兩會」今日開鑼，部分港區全國人大代表同全國政協委員尋日起分批赴京參加會議，卓妮都去咗機場貴賓室外趁熱鬧，見到多名政協好似「美容教母」鄭明明、蔣麗芸（Ann）、工聯會陳婉嫻及林淑儀等，個個都打扮得靚靚上京，其中阿Ann仲有老公梁海明專程去送機，遲幾日更會上京同阿Ann會合，一齊出外遊山玩水，認真羨煞旁人。
鄭明明帶四箱大行李
每年北京「兩會」出名又凍又乾燥，一眾人大政協都做好準備，好似阿Ann就帶備羽絨同潤喉糖上京，而鄭明明則帶備大量禦寒衣物，共有四個大行李箱，肯定唔怕冷親。至於人稱「芬姐」嘅朱蓮芬亦皮草不離手，除咗一手攞住紫色嘅皮草入貴賓室外，原來仲帶備紅色同黑色嘅皮草同行。被問及最鍾意邊件皮草時，芬姐話係紅色，因為有大紅大紫嘅感覺喎！
至於兩名政協常委楊孫西同盧文端，佢哋就搭早一班飛機上京，又係冇約定嘅情況下，同往年一樣帶備貴州茅台上京與友好開懷暢飲，其中楊孫西仲帶咗成六箱酒添，如果攤分十多日飲用，即係幾乎每兩日就要飲一箱，但以楊孫西嘅過人酒量，相信飲幾多都綽綽有餘。相反盧文端就只係帶咗一箱茅台酒上京，莫非佢有存貨擺喺北京？
卓妮