中環出更：賢慧三花籌備愛家日
近排春寒料峭，灰蒙蒙嘅天氣令人提唔起勁，尋日終於放晴，香港青年聯會賢慧社主席羅詠詩（Anthea）就約埋副主席林玉茵（Maya）同周沁食飯，密斟四月十日舉行嘅第三屆「青聯賢慧愛家日」活動。Anthea話，今年免費招待低收入兒童及家庭暢遊海洋公園人數，由去年八百人倍增至一千五百人，規模龐大，所以更唔可以掉以輕心喎。
千人宣讀弟子規
Anthea及Maya係今屆愛家日活動嘅籌委會聯席主席，周沁係副主席，難怪三位靚女咁緊張。Anthea話，今屆活動唔止帶小朋友遊公園咁簡單，仲會同青聯旗下「香港國學中心」合辦，喺現場向每位小朋友及嘉賓派發「弟子規」，到時千幾人同時宣讀，場面都幾壯觀，目的係想宣揚孝順父母、尊敬師長嘅道理。Anthea又預告，賢慧社前主席彭芷君會由加拿大返港參加愛家日活動，到時大家又可以歡聚暢談喇！